Tuesday, February 24, 2015

ဘုန်းတော်ကြီးသင်ပညာရေးကျောင်းများကိစ္စနှင့် ပတ်သက်၍ လုပ်ကြံတိုက်ခိုက်မှုများ။

ဘုန်းတော်ကြီးသင်ပညာရေးကျောင်းများကိစ္စနှင့် ပတ်သက်၍ လုပ်ကြံတိုက်ခိုက်မှုများ။

ရန်ကုန်စီးပွားရေးတက္ကသိုလ်ကျောင်းသားသမဂ္ဂ ဥက္ကဌ ကိုဇေယျာလွင်အား ယခုရက်ပိုင်းအတွင်း အွန်လိုင်းစာမျက်နှာအချို့နှင့် အကောင့်တချို့မှ စွပ်စွဲနေသော ဘကကျောင်း (ဘုန်းတော်ကြီးသင် ပညာရေးကျောင်း) များအား ဖျက်သိမ်းရန် တောင်းဆိုခဲ့သည်ဟုလည်းကောင်း၊ ဥပဒေတွင် ထည့်သွင်းရန် အကြံပြုခဲ့သည်ဟုလည်းကောင်း မဟုတ်မမှန် လုပ်ကြံစွပ်စွဲရေးသား ၀ါဒဖြန့်နေကြခြင်းနှင့် ပတ်သက်၍ ကိုဇေယျာလွင်အပါအ၀င် ဆွေးနွေးပွဲသို့ တက်ရောက်ခဲ့သည့် တကသ စီးပွားရေးတက္ကသိုလ်မှ ကျောင်းသားကျောင်းသူများမှ ဘကကျောင်းများ ဖျက်သိမ်းရန် လုံးဝဆွေးနွေးပြောကြားသွားခဲ့ခြင်း မရှိပါ။

ထိုသို့  မဟုတ်မမှန် လုပ်ကြံပြောဆို ရေးသားပြောဆိုနေကြရုံသာမက ကိုဇေယျာလွင်၏ ဓါတ်ပုံများ နေရပ်လိပ်စာများ ဖော်ပြပြီး ခြိမ်းခြောက်ပြောဆိုနေခြင်းများရှိနေခြင်းသည် ကျောင်းသားသပိတ်အား ဦးဆောင်နေကြသော ကျောင်းသားများအား တိုက်ခိုက်ရန် ရည်ရွယ်ချက်ဖြင့် လုပ်ဆောင်နေခြင်းအပြင် တရားဥပဒေစိုးမိုးမှုမရှိသော လုပ်ရပ်ဟု ယူဆပါသည်။

လွှတ်တော်မှအတည်ပြုခဲ့သည့် အမျိုးသားပညာရေးဥပဒေ မူရင်း ပုဒ်မ ၆၈ (က) တွင် ဘာသာရေးကိုသာသီးသန့်သင်ကြားသော ကျောင်းများသည် ယခု ဥပဒေနှင့်သက်ဆိုင်ခြင်း မရှိစေရဟု ဖော်ပြထားပြီး ဖြစ်ပါသည်။

ယခု ၄ပွင့်ဆိုင်တွေ့ဆုံပွဲမှ သဘောတူညီချက်အရ ပြန်လည်ပြင်ဆင်တင်သွင်းသည့် ဥပဒေကြမ်းတွင် အထက်ပါ ပုဒ်မ ၆၈ (က) အား ပယ်ဖျက်ခြင်း မရှိပါ။ ဘာသာရေးကျောင်းများတွင် သင်ကြားသောပညာရေးကဏ္ဍဟု ဖော်ပြပါရှိမှုသည် ပညာရေးသက်သက်ကိုသာ သင်ကြားသော ပညာဒါနကျောင်းများကို ဆိုလိုရင်းဖြစ်ပြီး၊ ပညာရေးဝန်ကြီးဌာနမှ ပြဌာန်းစာအုပ်များနှင့် မေးခွန်းလွှာများကို လေ့ကျင့်သင်ကြားပေးသော မူလတန်း အလယ်တန်းများကိုသာ ဆိုလိုရင်း ဖြစ်ပါသည်။

ဘက ကျောင်းဟုခေါ်သော ဘုန်းတော်ကြီးသင်ပညာရေးကျောင်းများသည် ပညာရေးသက်သက်ကိုသာ သင်ကြားခြင်းဖြစ်ပြီး ဗုဒ္ဓဓမ္မစာပေ ကျမ်းဂန်များ သင်ကြားသည့်ပရိယတ္တိစာသင်တိုက်များ၏ သဘောသဘာဝ ကွာခြားကြောင်း လူအများ နားလည်သိရှိပြီး ဖြစ်ပါသည်။

အမျိုးသားပညာရေးဥပဒေကို ပြင်ဆင်သည့် ဥပဒေကြမ်းမှာ ထပ်မံဖြည့်စွက်တာသာ ရှိပါသည်။

ကိုဇေယျာလွင်အား ဗုဒ္ဓဘာသာ ဘုန်းတော်ကြီးကျောင်းများ ဖျက်သိမ်းခိုင်းသည်ဟုဆိုကာ လုပ်ကြံတိုက်ခိုက်သည့် ရည်ရွယ်ချက်နှင့် စတင်ဖန်တီးလုပ်ဆောင်သူများအား ဆန်းစစ်ကြည့်ရာတွင် ကျောင်းသားသပိတ်၏ အမျိုးသားပညာရေးဥပဒေပြင်ဆင်ရေးလှုပ်ရှားမှုအား ပြည်သူလူထုမှ ယုံကြည်မှုပျက်ပြားစေရန်အတွက် ဦးဆောင်နေကြသော ကျောင်းသူကျောင်းသားခေါင်းဆောင်များအား အဓိကပြစ်မှတ်ထား၍ လုပ်ကြံနေခြင်းဖြစ်ကြောင်းနှင့် စတင်ဖန်တီး လှုံ့ ဆော်တိုက်ခိုက်သူများသည် ယခင် ဘာသာရေး လူမျိုးရေး ပဋိပက္ခများအား ဖန်တီးခဲ့သည့် ၉၆၉ နှင့် မဘသ အစွန်းရောက်သူများ၏ ဖေ့စ်ဘွတ်စာမျက်နှာအကောင့်များဖြစ်ကြောင်း တွေ့ ရှိရကာ၊ ပရဟိတစေတနာဖြင့် ပညာရေးသင်ကြားပေးနေသော ဘုန်းတော်ကြီးကျောင်းများနှင့် ဘာသာတရားကို ကိုင်းရှိုင်းယုံကြည်သက်ဝင်သူများအနေဖြင့် အမျိုးသားပညာရေးဥပဒေပြင်ဆင်ရေး ကျောင်းသားလှုပ်ရှားမှုအပေါ် အထင်အမြင်လွဲမှားစေရန် လုပ်ဆောင်ခြင်း ဖြစ်ကြောင်း သိရှိရပါသည်။

ကိုဇေယျာလွင်အပါအ၀င် ကျောင်းသူကျောင်းသားများ၏ အမျိုးသားပညာရေးဥပဒေပြင်ဆင်ရေးလှုပ်ရှားမှု ကျောင်းသားသပိတ်စစ်ကြောင်း၏ တောင်းဆိုချက်များ၊ အမျိုးသားပညာရေးဥပဒေ ပြင်ဆင်ရန် အချက်အလက်များနှင့် ပတ်သက်၍ ဖေ့စ်ဘွတ်စာမျက်နှာတွင်လည်းကောင်း၊ ပြင်ပတွင်လည်းကောင်း ပြောဆိုရေးသားမှုများနှင့် ပတ်သက်၍ သေသေချာချာ တိတိကျကျ သိရှိစေရန် သက်ဆိုင်ပတ်သက်သော သပိတ်မှောက် ကျောင်းသူကျောင်းသားများထံ တိုက်ရိုက်ဆက်သွယ် မေးမြန်းခြင်းဖြင့် မလိုလားအပ်သော သွေးထိုးခြင်းများ လုပ်ကြံဖန်တီးခြင်းများ ဘေးအန္တရာယ်မှ ကင်းဝေးနိုင်မည် ဖြစ်ပါကြောင်း အကြံပြုတိုက်တွန်း လိုက်ရပါသည်။

ယခင်ခေတ်အဆက်ဆက်မှ ပြောကြားနေကြသော “ရန်သူထောက်လှမ်းရေး သိပ်တော်တာ၊ အကွက်ကျကျ ဖြိုခွင်းနိုင်တယ်” ဆိုသော စကားကို ချေပရမည်ဆိုပါက - ရန်သူတော်တာ မဟုတ်ပါ။ ကျွန်တော်တို့  လူမျိုးများ၏ တစ်ဖက်သား စကားကို အယုံလွယ်ပြီး၊ မှန်၏ မမှန်၏ကို ကိုယ်တိုင်ကိုယ်ကျ ထောင့်စေ့အောင် လေ့လာစူးစမ်းပြီး မိမိ၏ ကိုယ်ပိုင် အသိဥာဏ်ဖြင့် စီစစ်သုံးသပ် ကောက်ချက်ချခြင်း၊ မရှင်းလင်းသည်ကို တိုက်ရိုက်သက်ဆိုင်သူများနှင့် ဆက်သွယ်မေးမြန်း ဆွေးနွေးမှု ပြုခြင်း အားနည်းမှုများကြောင့် ဖြစ်ပေသည်။

အမျိုးသားပညာရေးဥပဒေ ပြင်ဆင်ရေးနှင့် ပတ်သက်၍ အသေးစိတ် လေ့လာကြရန် ထပ်မံတိုက်တွန်းလိုက်ရပါသည်။





No comments: