(၆၁) နှစ်မြောက် အာဇာနည်နေ့ အထိမ်းအမှတ် အခမ်းအနား အမျိုးသားဒီမိုကရေစီ အဖွဲ့ချုပ် (လွတ်မြောက်နယ်မြေ ) မလေးရှားတွင် ကျင်းပပြုလုပ်။

(၆၁)နှစ်မြောက် အာဇာနည်နေ့ အထိမ်းအမှတ် အဖြစ် ကျဆုံးလေပြီးသော အာဇာနည် ခေါင်းဆောင်ကြီး များကို ရည်စူး ၍ သံဃာတော် များအား ဆွမ်းဆက်ကပ်လှုဒါန်း ခြင်းနှင့် အာဇာနည်နေ့ အလေးပြုခြင်း အစီအစဉ် ကို ယနေ့ ၁၉ ရက် ၊ဇူလိုင်လ၊၂၀၀၈ တွင် မလေးရှားနိုင်ငံ ကွာလာလမ်ပူ မြို့ရှိ အမျိုးသား ဒီမိုကရေစီ အဖွဲ့ချုပ် (လွတ်မြောက်နယ်မြေ ) ရုံးခန်းတွင် ကျင်းပ ပြုလုပ်ခဲ့ပါသည် ။

အခမ်းအနား အစီအစဉ်အရ အမျိုးသားဒီမိုကရေစီ အဖွဲ့ချုပ် (လွတ်မြောက်နယ်မြေ ) မလေးရှားမှ ဥက္ကဌ ဦးကျော်ကျော် နှင့် အလုပ်အမှုဆောင်များ ၊ ပါတီဝင်များ မှ အာဇာနည်ခေါင်းဆောင် ကြီးများနှင့်တကွ ဒီမိုကရေစီ အရေးတော်ပုံ အဆက်ဆက်တွင် ကျဆုံးသွားသော သူရဲကောင်းများ ၊ ရဲဘော်ရဲဘက် များကို ရည်စူး၍ သံဃာတော် အရှင်သူမြတ် များအားနေ့ဆွမ်းဆက်ကပ်လှုဒါန်းပါသည်။ ဆက်လက်၍ လှုဖွယ် ဝတ္ထုများ ဆက်ကပ်လှုဒါန်းကာ ပြုလုပ် ရသော ဒါနကုသိုလ် အစုစု တို့ကို ရေစက် သွန်းချ အမျှဝေ လှုဒါန်းကြပါသည် ။

ထို့နောက် (၆၁ ) နှစ်မြောက် အာဇာနည်နေ့ အလေးအမြတ် ပြုခြင်း အစီအစဉ်အရ -

(၁) ပါတီအလံတော်အား အလေးပြုခြင်း၊
(၂) ကျဆုံးလေပြီးသော အာဇာနည် ခေါင်းဆောင်ကြီးများ အား အလေးပြု၍ ဝမ်းနည်းခြင်း အထိမ်းအမှတ် (၁) မိနစ် ငြိမ်သက်ခြင်း၊
(၃) ဒီမိုကရေစီ အရေးတော်ပုံ အဆက်ဆက် တွင် ကျဆုံးသွားသော သူရဲကောင်းများနှင့် တိုက်ပွဲဝင် ရဲဘော်များ အား အလေးပြုခြင်း၊
(၄) ပါတီသစ္စာ အဓိဌန် (၄)ချက် ရွတ်ဆိုခြင်း၊

တို့ကိုပြုလုပ် ၍ (၆၁ ) နှစ်မြောက် အာဇာနည်နေ့ အခမ်းအနား အစီအစဉ်ကို အောင်မြင်စွာ ကျင်းပ ခဲ့ပါသည် ။

အမျိုးသားဒီမိုကရေစီ အဖွဲ့ချုပ် (လွတ်မြောက်နယ်မြေ ) မလေးရှား
သတင်း နှင့် ပြန်ကြားရေး ကော်မတီ။