မာလာရုံကျောင်းတိုက်သို့ ဥပဒေမဲ့ စီးနင်းရှာဖွေဖမ်းဆီးခြင်းအား ပြင်းထန်စွာကန့်ကွက်ရှုတ်ချ။

မာလာရုံကျောင်းတိုက်သို့ ဥပဒေမဲ့ စီးနင်းရှာဖွေဖမ်းဆီးခြင်းအား ပြင်းထန်စွာကန့်ကွက်ရှုတ်ချ။

နအဖစစ်အစိုးရ၏ လက်ကိုင်တုတ်များမှ ရန်ကုန်တိုင်း၊ သံလျင်မြို့နယ် ဗိုလ်ချုပ်ရွာရှိ မာလာရုံကျောင်းတိုက်သို့ (၅-၉-၂၀၀၈) ရက်နေ့ နံနက် (၂) နာရီခန့်က ရန်သူ့စခန်းကိုဝင်ရောက်စီးနင်းသည့်အလား ဥပဒေမဲ့စွာ ကျူးလွန်စော်ကားခဲ့ကြပါသည်။

ကျောင်းတိုက်တစ်ခုလုံးကို တစ်နာရီနီးပါး ရစရာမရှိအောင် မွှေနှောက်ရှာဖွေခဲ့ကြပါသည်။ ထိုသို့စစ်ဆေးရှာဖွေနေစဉ် ကာလတွင်လည်း ကျောင်းနေသံဃာတော် (၁၇) ပါးကို ၀မ်းလျားမှောက်ခိုင်းထားပြီး အကြောင်းပြချက်တစုံတရာမပေးဘဲ ကျောင်း ကိုဝင်ရောက်ရှာဖွေပြီး ကျောင်းထိုင်ဆရာတော် ဦးသီလ၀ံသအပါအ၀င် သံဃာ၁၇ပါးစလုံးကို အတင်းအဓမ္မဖမ်းဆီး ခေါ်ဆောင် သွားခဲ့ပါသည်။

မာလာရုံကျောင်းတိုက်သည် ဗုဒ္ဓသာသနာထွန်းကားပြန့်နှံ့စေရေးအတွက် အထူးတလည်အာရုံထား၍ သာသနာပြုနေ သောကမ္မဋ္ဌာန်းကျောင်းတိုက် တစ်တိုက်ဖြစ်ပါသည်။ ဆရာတော် ဦးသီလ၀ံသသည်လည်း သံဃာငယ်များကို စာဝါပို့ချ ကမ္မဋ္ဌာန်း နည်းပြနေသော ဆရာတော်တစ်ပါးဖြစ်ပါသည်။ ကျောင်းနေသံဃာငယ်များမှာလည်း ပရိယတ္တိ၊ ပဋိပတ္တိ၊ ပဋိဝေဒ ဟူသည့် သာသနာသုံးရပ်ကို လုံ့လစိုက်၍ ထမ်းရွက်နေသော သံဃာတော်များဖြစ်ပါသည်။

ဤကဲ့သို့သောကျောင်းတိုက်နှင့် ဤကဲ့သို့သော ဆရာတော် သံဃာတော်များကို ယခုကဲ့သို့ပြုမူဆောင်ရွက်ခြင်းသည် ဘာသာ သာသနာကို ဖျက်လိုဖျက်ဆီးလုပ်ခြင်း၊ ကျူးလွန်စော်ကားလိုက်ခြင်းပင်ဖြစ်ပါသည်။

ဤလုပ်ရပ်အား မြန်မာနိုင်ငံလုံးဆိုင်ရာ သံဃာ့တပ်ပေါင်းစုအဖွဲ့ကြီးမှ ပြင်းထန်စွာကန့်ကွက်ရှုတ်ချလိုက်ပါသည်။

နအဖစစ်အစိုးရအနေဖြင့် ဖမ်းဆီးခေါ်ဆောင်သွားသော ဆရာတော်အား အမြန်ဆုံးပြန်လည်လွှတ်ပေးရန်နှင့် ကျူးလွန် စော်ကားမိခဲ့သမျှကို သံဃာတော်များကျေနပ်သည်အထိ အမြန်ဆုံးဝန်ချတောင်းပန်ရန် မြန်မာနိုင်ငံလုံးဆိုင်ရာ သံဃာ့တပ်ပေါင်းစု အဖွဲ့ကြီးက အလေးအနက်တောင်းဆိုလိုက်သည်။

ဤတောင်းဆိုချက်များကို ဖြေရှင်းပေးရန်ပျက်ကွက်ခဲ့ပါက ဖြစ်ပေါ်လာမည့်အကျိုးဆက်အရပ်ရပ်သည် နအဖစစ်အစိုးရ၏ တာဝန်သာဖြစ်သည်ဆိုသည့်အချက်ကိုလည်း ထပ်မံသတိပေးလိုက်သည်။

မြန်မာနိုင်ငံလုံးဆိုင်ရာ သံဃာ့တပ်ပေါင်းစုအဖွဲ့ကြီး။

၁၃၇၀ ခု တော်သလင်းလဆန်း (၇) ရက်။

၂၀၀၈ ခုနှစ် စက်တင်ဘာလ (၆) ရက်။