ပြောပြန်ရင်လည်း လွန်တော့မယ် (၄)။

ပြောပြန်ရင်လည်း လွန်တော့မယ် (၄)။

စိုးသိန်းတစ်ဦးတည်းရဲ့ လုပ်ချင်သလိုလုပ် မူဝါဒရဲ့ နောက်ဆက်တွဲရလဒ်တွေက ကောင်းတဲ့ အနေအထားမှာ မရှိဘူးဆိုတာ နည်းနည်းလောက် တွေးကြည့်တတ်ရုံနဲ့တင် မြင်လောက်မယ်လို့  ယုံကြည်ပါတယ်။ သူထင်သလို လုပ်နေတဲ့ လုပ်ရပ်တွေကြောင့်လည်း မြန်မာနိုင်ငံမှာ နောက်လာမယ့် အချိန်တိုကာလအတွင်းမှာ မြန်မာသူဌေးတွေ တော်တော်များများ ပျောက်ကွယ်သွားမယ့် အလားအလာ ရှိပါတယ်လို့ မြင်နေရတယ်။

လောဘဇောတိုက် သပိတ်ဝင်အိတ်ဝင်ဖြစ်တုန်း ကဲ့ထုတ်ချင်တဲ့ စိတ်ဓါတ်ပိုင်ရှင် စိုးသိန်းကြောင့် မြန်မာနိုင်ငံသား၊ မြန်မာလူမျိုးများပိုင်ဆိုင်ရမယ့်အပြင် မြန်မာနိုင်ငံသားလုပ်ငန်းရှင်တွေ ဦးဆောင်လုပ်ကိုင်နိုင်စွမ်းရှိတဲ့ စီးပွားရေးလုပ်ငန်းတွေဟာ နိုင်ငံခြား ရင်နှီးမြှုပ်နှံမှုတွေကြောင့် နိုင်ငံသားပိုင် လုပ်ငန်းတွေ လျော့သွားမယ်။ ဒါ့အပြင် ပြည်သူတွေဟာလည်း မကြာမီ တိုင်းတပါးနိုင်ငံခြားသားအလုပ်ရှင်တွေထံမှာ ကျွန်သာသာ အလုပ်သမားဘဝနဲ့ နေရတော့မယ်။ အခုခေတ်က လက်နက်နဲ့တိုက်ယူပြီး နယ်မြေ တွေသိမ်းတာထက် ငွေအင်အားကြီးတဲ့နိုင်ငံတွေဟာ ဖွံ့ဖြိုးဆဲ နိုင်ငံတွေမှာ စီးပွားရေးအင်ပါယာထူထောင်ပြီး သိမ်းပိုက်နိုင်တဲ့ခေတ်ဖြစ်နေတယ်ဆိုတာ သတိပြုမိဖို့လိုပါတယ်။

စိုးသိန်းရဲ့မိန်းမ ဒေါ်ခင်အေးကြင် (ယခင်နာမည်ဟောင်း) ဟာ တရုတ်ပြည်ဖွား ဧည့်နိုင်ငံသား လက်မှတ်ကိုင် ဦးဘီလားလို့ခေါ်တဲ့ တရုတ်စစ်စစ်ကြီးတစ်ဦးရဲ့ သမီးဖြစ်ပါတယ်။ ဒီအကြောင်း ဘာကြောင့် ဖော်ပြထားရသလဲဆိုတော့ မြန်မာလူမျိုးများကို တရုတ်တွေတွေ့တိုင်း နောက်ကွယ်မှာ အမြဲလှောင်ခံရတဲ့ စက်မှု (၂) တံဆိပ်ကပ် မြန်မာစတေရှင်ဝပ်ဂွန် (Myanmar Station Wagon) အမျိုအစား ပါရာဒိုကားတွေကိစ္စပဲ ဖြစ်ပါတယ်။ သူ့မိန်းမ သူယောက္ခမ မိသားစုများ ကောင်းစားရေးအတွက် ပြည်သူကို မငဲ့ကွက် အာဏာကို အလွဲသုံးစားလုပ်ပြီး အခုလို ဥပဒေမဲ့ လုပ်ရပ်တွေ လုပ်ချင်သလို လုပ်နေတာဟာ စဉ်းစားစရာပါပဲ။ စဉ်းစားကြည့်ရင် ရင်နာဖို့ကောင်းတာက မြန်မာတွေဟာ သူများနိုင်ငံထုတ် ကားအမျိုးအစားကို ကိုယ့်နိုင်ငံထုတ်သယောင် တံဆိပ်ကပ်ပြီး ဒေါင်းယောင်ဆောင်ခဲ့တဲ့အကြောင်းကို တစ်ဖက်နိုင်ငံရဲ့အမြင်မှာ ကိုယ့်လူမျိုးတွေကို ဘယ်လောက် လှောင်ပြောင်ခဲ့မလဲဆိုတာ စဉ်းစားသာကြည့်စေ ချင်ပါတယ်။ ဒီကားတွေကို သူ့အမျိုးတွေရဲ့ အဆက်အသွယ်တွေနဲ့ ပွဲစားလုပ်ပြီး တင်သွင်းရောင်းချခဲ့ခြင်း ဖြစ်ပါတယ်။

၈၈ အရေးအခင်းတုန်းက အများနဲ့အတူရောယောင်ပြီး အရေခြုံခဲ့တဲ့ ကိစ္စတစ်ခု ဖြစ်ခဲ့ဖူးပါတယ်။ တခြားတော့ မဟုတ်ပါဘူး။ ခါတော်မှီ စိုးသိန်းဟာ ၈၈ DSA သမဂ္ဂအဖွဲ့မှာ ဗိုလ်မှုးအဆင့်နဲ့ ဝင်ပါခဲ့တဲ့အပြင် တန်းစီလှည့်လည်တဲ့နေရာမှာလည်း လိုက်ပါခဲ့ပါသေးတယ်။ ဒါ့အပြင် သမဂ္ဂအစည်းအဝေး တော်တော်များများကို In Service ဖြစ်နေတုန်းမှာ တပ်မတော်ကို သစ္စာဖောက်ပြီး တက်ရောက်ခဲ့တဲ့ အထောက်အထားတွေ သက်သေနဲ့တကွ ရှိပါတယ်။ စိုးသိန်းရဲ့ သာကူးစိတ်ဓါတ်ကို ဒီနေရာမှာ အတိုင်းသားတွေ့ရသလို ဒီကိစ္စတွေ လုပ်ခဲ့မိတဲ့အတွက် အရေးယူခံရမှာစိုးလို့ ညဘက်တွေမှာ အိပ်လို့တောင် မပျော်ခဲ့ပဲ ဥ.စ.တ (စစ်ဦးစီးတက္ကသိုလ်) ကို တက်ရတော့မှ ရင်ထဲကအလုံးကြီး ကျသွားသလို ပေါ့သွားတယ်လို့ ပြောဖူးပါတယ်။

ဗိုလ်မှုးအဆင့်ဆိုတာ In service ဖြစ်နေတဲ့ အခြေအနေပါ။ ဒါဟာ သူ့အကျင့်ဖြစ်တဲ့ ပေါ်ပြူလာဖြစ် အောင်လုပ်လိုတဲ့ဆန္ဒ၊ ကိုယ့်ကိုယ်ကိုယ် လော်ဘီလုပ်လိုတဲ့ ဆန္ဒနဲ့ ဆောင်ရွက်ခဲ့တယ်ဆိုတာ အသိသာကြီးပါ။ ဒါတွေကိုကြည့်ရင် ကိုယ်ကျိုးစီးပွားရှာ၊ ကိုယ်ကောင်းစားရေး တစ်ဘို့တည်းပဲ ကြည့်တဲ့လုပ်ရပ်တွေအဖြစ် အတိုင်းသားမြင်ရပါတယ်။

အရင် အာဏာမရှိခင်တုန်းက ဒီလိုဖြစ်နေတယ်ဆိုရင် အခုလို သမ္မတရုံးဝန်ကြီးဘဝဆိုရင် ဘယ်လောက်တောင် ကိုယ်ကျိုးရှာ အာဏာကို အလွဲသုံးစားလုပ်မယ်ဆိုတာ ပိုပြီးပေါ်လွင် ထင်ရှားနေပါတယ်။

စိုးသိန်းဟာ မြန်မာ့ရင်းနှီးမြှုပ်နှံမှုကော်မရှင်ဥက္ကဌ၊ သမ္မတရုံးဝန်ကြီးဆိုတဲ့ ရာထူးယူထားပြီး ဒုတိယ သမ္မတတွေကို ကျော်ပြီး ပိုမိုထင်ရှားအောင် နေရာယူပါတယ်။ ၂၀၁၅ ခုနှစ်မှာ သမ္မတ ဖြစ်ချင်ဇောနဲ့ စည်းရုံးရေးအတွက် ငွေရှာနေတာလား? ဒါမှမဟုတ် သူ့အတ္တအတွက် ငွေရှာနေတာလား မသိတော့ပါ။ ရှက်တတ်ရင် လဲသေလို့ ရတယ်ဆိုတဲ့စကားအတိုင်းပဲ ပြောရတော့မယ်။ ဒုသမ္မတတွေလည်း စိုးသိန်းလို လူမျိုးလောက်ရဲ့ အကြောကို ခံလို့ ပြည်သူ့အမြင်မှာ သာရေးနာရေးသမ္မတလို့ ခေါ်ခံရလောက်အောင် ဘာဆေးစားမှားလို့ ကြောက်ချေးပန်းနေတယ် မသိဘူး။ ရုံးအုပ်လောက်အဆင့်ရှိတဲ့သူက ဒုဥက္ကဌရာထူးလောက်ကို ဘာလုပ်နိုင်မှာမို့လို့ ဒီလောက် ကြောက်နေတာလဲဆိုတာ စဉ်းစားစရာ ဖြစ်လာတယ်။ တကယ့်ကို ရုပ်သေးအစိုးရဆိုတဲ့ စကားလုံးနဲ့ အံဝင် ခွင်ကျဖြစ်သွားတော့တာပါပဲ။

စိုးသိန်း အခုလို ဒုသမ္မတတွေကို မခန့်လေးစား ကျော်လုပ်နေတာဟာ သိန်းစိန်ရဲ့ အကာအကွယ် ကြောင့်လား? ဒါမှမဟုတ် စိုးသိန်းဟာ ပြည်ပအင်အားကြီးနိုင်ငံတွေရဲ့ လက်ကိုင်တုတ်ဖြစ်နေလို့ သမ္မတကိုယ်တိုင် ကြောက်ရတဲ့လူ ဖြစ်နေလို့လား? ဒီလိုဆို အခုတက်လာတဲ့ သိန်းစိန်အစိုးရကို ဘယ်လို အခြေအနေမျိုးမှ ယုံရတော့မလဲ? စိုးသိန်းဟာ နိုင်ငံရေးအမြတ်ထုတ်လို့ လာမယ့် သမ္မတသက်တမ်းမှာ သမ္မတလုပ်ဖို့ အားထည့်တဲ့အနေနဲ့ သူ့လုပ်ရပ်တွေဟာ သူ့ကိုယ်သူ လော်ဘီလုပ်နေတယ်ဆိုတာ မြင်သာလာပါတယ်။

(အပိုင်း ၅ မှာ ဆက်လက်ရှုစားပါခင်ဗျာ။)

ပေးပို့ သူ - တီအေကေ။