မတ်လ (၁၃) ရက်နေ့  - ကိုဖုန်းမော်နေ့  - မြန်မာနိုင်ငံလူ့ အခွင့်အရေးနေ့  သမိုင်းကြောင်း။

မတ်လ (၁၃) ရက်နေ့  ကျောင်းသားအရေးအခင်း (သို့ ) ကိုဖုန်းမော်နေ့  (သို့ ) မြန်မာနိုင်ငံလူ့  အခွင့်အရေးနေ့  သမိုင်းကြောင်း။

ရှစ်လေးလုံးအရေးတော်ပုံကြီး စတင်ပေါ်ပေါက်စေခဲ့တဲ့ ၁၉၈၈ ခုနှစ်၊ မတ်လဆန်းမှာ အာဏာရှင်လက်ပါးစေတွေရဲ့  မတရားလုပ်ရပ်ကြောင့် စက်မှုတက္ကသိုလ်ကျောင်းသား ကိုဖုန်းမော် ကျဆုံးခဲ့ရမှုနှင့် မတရားမှုကို အစဉ်အမြဲ ဆန့် ကျင်တော်လှန်ရဲတဲ့ ကျောင်းသားတို့ ၏ အာဏာရှင်အား စိန်ခေါ်မှု မှတ်တမ်း ဖြစ်ပါတယ်။

အာဏာရှင်အား ရဲရဲဝန့် ဝန့် ရင်ဆိုင်ပြီး ဆန့် ကျင်တိုက်ပွဲဝင်ကာ ကျဆုံးခဲ့ကြသော စက်မှုတက္ကသိုလ်ကျောင်းသား ကိုဖုန်းမော်နှင့် ကျောင်းသားအပေါင်းအား ဂုဏ်ပြုသောအားဖြင့် အဆိုပါ မတ်လ (၁၃) ရက်နေ့ အား မြန်မာနိုင်ငံလူ့ အခွင့်အရေးနေ့ အဖြစ် သတ်မှတ်ဂုဏ်ပြုခြင်း ဖြစ်ပါတယ်။

၁၉၈၈ ခုနှစ်၊ မတ်လ (၁၃) ရက်နေ့  အချိန်ကာလမတိုင်ခင် နောက်ခံသမိုင်းကြောင်း ဖြစ်ပေါ်မှုများကတော့ -

၁၉၈၇ ခုနှစ် စက်တင်ဘာ (၅) ရက်နေ့မှာ မြန်မာနိုင်ငံမှာ အသုံးပြုနေတဲ့ ၂၅ ကျပ်တန် ၃၅ ကျပ်တန် နဲ့ ၇၅ ကျပ်တန် ငွေစက္ကူတွေကို တရားမ၀င် ဖျက်သိမ်းပါတယ်လို့ အာဏာရှင် နေ၀င်းဦးဆောင်တဲ့ မဆလအစိုးရက ကြေညာလိုက်ပါတယ်။ ယခုပိုက်ဆံသိမ်းတာ မတိုင်ခင် အရင်က သိမ်းခဲ့တဲ့ ၁၀၀ တန် (ခေါင်းပေါင်း လို့ ခေါ်ပါတယ်) တွေ သိမ်းတုန်းကလိုမျိုး ပြန်လဲပေးမလားဆိုတဲ့ အသိနဲ့ လူတွေ စောင့်မျှော်ခဲ့ပါသေးတယ်။ ဒါကြောင့်မို့ လို လိုက်ဝယ်တဲ့ သူတွေကလည်း ဖျက်သိမ်းပြီးသား ငွေစက္ကူတွေကို အရေးတကြီး ငွေလိုအပ်သူတွေ ဆီက လိုက်ဝယ်ခဲ့ကြပါတယ်။

အဲဒီအချိန်က ရန်ကုန်စက်မှုတက္ကသိုလ်မှာ စာမေးပွဲကြီးကျင်းပနေတဲ့ အချိန်ဖြစ်ပါတယ်။

စာမေးပွဲရက်အတွင်း ငွေစက္ကူတွေ အသိမ်းခံရတော့ ပိုက်ဆံပြတ်သူ ပြတ် ဖြစ်ကုန်ကြတဲ့ ကျောင်သားတွေက အဆောင် အပြင်ကိုထွက်လာကြပါတယ်။ ကျောင်းသား အချို့က ကျောင်းရှေ့ တိုင်လုံးကြီးတွေ အောက်မှာ ထိုင်သူထိုင် အချို့ကလည်း ကျောင်းအပြင် အင်းစိန်လမ်းမပေါ်က ပလက်ဖောင်းပေါ် ထွက်ထိုင်သူထိုင်နဲ့ တစ်ယောက်တစ်ပေါက် ပြောဆိုရင်း ဒေါသထွက်သူထွက် စိတ်ဓာတ်ကျသူကျ ဖြစ်နေကြပါတယ်။ အဲဒီ အချိန်မှာပဲ အင်းစိန်လမ်းမပေါ်ထွက်ထိုင်နေတဲ့ ကျောင်းသား အချို့က ဒီငွေစက္ကူတွေ သုံးမရရင် ဘာလုပ်ရတော့မှာလဲ .. မီးရှို့ကွာ .. ဆိုပြီး စလိုက်ရာက လမ်းပေါ်မှာ ငွေစက္ကူ မီးရှို့ပွဲ ဖြစ်ခဲ့ပါတယ်။ မကျေနပ်မှုတွေက စတင်ပေါက်ကွဲထွက်လာပါတယ်။

မိနစ်အနည်းငယ်ခန့် ကြာပြီးတဲ့ အခါမှာတော့ သမိုင်းလမ်းဆုံဘက်က မောင်းလာတဲ့ မာဇဒါဂျစ် အစိုးရတံဆပ်တပ်ထားတဲ့ ပြည်သူ့လုပ်အား ပြန်လည် နေရာချထားရေး ဦးစီးဌာနက ကားတစ်စီးက ကျောင်းသားတွေ အုပ်စုနားရောက်တော့ ရုတ်တရက် ကျွီကနဲ မြည်အောင် ဘရိတ်အုပ်ပြီး ရပ်လိုက်ပါတယ်။ ကားပေါ်က အရာရှိဖြစ်ဟန် တူတဲ့ လူတစ်ယောက်က ကားပေါ်က ဆင်းလာတာ အရက်မူးနေပုံပေါ်ပါတယ်။ ထိုလူက ဘီပီအိုင် လမ်းကြားထဲ ပြေးဝင်သွားပါတယ်။ ကျောင်းသားတွေလည်း ... ဒါ.. မ.ဆ.လ က ကားပဲကွာ .. ချကျ ရိုက်ကျ ၊ လူကိုတော့ မထိစေနဲ့ ဆိုပြီး ကားကို မီးရှို့လိုက်ကြပါတယ်။ အဲဒီ အချိန်မှာပဲ ကျောင်းဝင်းထဲက ကျောင်းသား ကိုယ်စားလှယ် ၅ ဦးက မော်ကွန်းထိန်းနဲ့ ပါမောက္ခများမှတဆင့် ပညာရေးဝန်ကြီးထံ တောင်းဆိုမှုများ ပြုလုပ်ကြပါတယ်။ ကျောင်းပိတ်ပေးရန်၊ ငွေစက္ကူများ ပြန်လဲပေးရန် တောင်းဆိုကြပါတယ်။ ပညာရေးဝန်ကြီးရဲ့ တုန့်ပြန်ချက်ကတော့ ကျောင်းပိတ်ပေးပြီး ကျောင်းသားများကို နေရပ်ပြန်ပို့ပေးမယ် ဟု ဆိုလာပါတယ်။ ငွေစက္ကူ ပြန်လဲပေးရန်ကတော့ မဆလ အစိုးရရဲ့ ပေါ်လစီ ဖြစ်တဲ့ အတွက် မလိုက်လျောနိုင်ပါဟု ဆိုပါတယ်။ ကျောင်းသားများလည်း ပညာရေးဝန်ကြီးရဲ့ ကမ်းလှမ်းမှုကို လက်ခံလိုက်ပါတယ်။

၁၉၈၇ ခုနှစ်၊ စက်တင်ဘာ (၆) ရက်နေ့ မနက် ၂နာရီကျော်လောက်မှာ ဒဂုံမန်း၊ မြေလတ်သား၊ ရာမည စတဲ့ ဟီးနိုးကားကြီးတွေ အာအိုင်တီကျောင်းဝင်းထဲကို ၀င်လာပါတယ်။ အဆောင်ကျောင်းသားများကို ဘီဆောင် အဆောင်မှုး ဆရာဦးဘမြင့်က တစ်ယောက် ၂၀၀ ကျပ် ခရီးစားရိတ် ဆိုပြီး ထုတ်ပေးခဲ့ကာ ကျောင်းသားများကို ဘူတာ ၊ ကားဂိတ်၊ လေဆိပ်များမှ တဆင့် အိမ်ပြန်ပို့ပေးခဲ့ပါတယ်။ ကျောင်းသားတွေရဲ့ နယ်ဒေသတွေက အိမ်အပြန်လမ်းမှာ မဆလ အစိုးရအပေါ် မကျေနပ်ချက်တွေက ကပ်ပါသွားခဲ့ပါတယ်။ အနယ်အနယ်အရပ်ရပ်က ရန်ကုန်မှာ ကျောင်းဆောင်နေ အဆောင်ကျောင်းသားတွေရဲ့  အိမ်အပြန် မကျေနပ်မှုတွေနဲ့  သာမန်ပြည်သူလူထုတွေရဲ့  ငွေစက္ကူတွေ မတရားသိမ်းပိုက်ခံရလို့  နေ့ စဉ်စားဝတ်နေရေးကအစ ချွေးနဲစာနဲ့  စုဆောင်းထားတဲ့ စုငွေလေးတွေပါ သုံးစွဲမရတော့လို့  ပူဆွေးမှု အစိုးရအပေါ် မကျေနပ်မှုတွေနဲ့  ပေါင်းစပ်မိသွားပါတယ်။

၁၉၈၈ ခုနှစ် ဇန်န၀ါရီလမှာ ကျောင်းတွေ ပြန်ဖွင့်ခဲ့ပါတယ်။ ကျောင်းတံခါးဖွင့်သံ ကျောင်းတက်ခေါင်းလောင်းထိုးသံနဲ့ အတူ မြန်မာပြည်သူတွေရဲ့ လူနေမှုဒုက္ခ၊ စီးပွားရေးကျပ်တည်းမှု တွေက ကျောင်းသားတွေနဲ့ ပြန်လည်လိုက်ပါလာခဲ့ပြန်တယ်။

ဒီလိုနဲ့  ၁၉၈၈ ခုနှစ် မတ်လ ၁၂ ရက်နေ့ စနေနေ့ ညနေပိုင်း မှောင်ရီဖြိုးဖျ အချိန်မှာ စက်မှုတက္ကသိုလ် ကျောင်းရဲ့ မျက်နှာချင်းဆိုင် အင်းစိန်လမ်းမ တစ်ဖက်မှာ ရှိတဲ့ စန္ဒာဝင်း လဘက်ရည်ဆိုင်ထဲကို ကိုဝင်းမြင့် (၁)၊ ကိုဝင်းမြင့် (၂) နဲ့ ကိုကျော်စံဝင်းတို့ သုံးယောက် ပုံမှန် လဘက်ရည်ဆိုင် ထိုင်နေကျ အတိုင်း ရောက်လာခဲ့ပါတယ်။ စန္ဒာဝင်းလဘက်ရည်ဆိုင်ကလေးက ကျောင်းသားများအတွက် အနီးဆုံး ကျောင်းဝင်းပြင်ပ အပန်းဖြေစရာ မျက်စိပသာဒ နားအာဟာရအတွက် သာမန် ကြီးကျယ်ခမ်းနားမှုကင်းတဲ့ လဘက်ရည်ဆိုင်ကလေးပါပဲ။ ကျောင်းသား ၃ ယောက်နဲ့ အတူ သူတို့အကြိုက် အဆိုတော် စိုင်းထီးဆိုင်ရဲ့ အခွေတစ်ခွေပါလာတယ်။ ထုံးစံအတိုင်း ကျောင်းသားများက ကိုယ်နှစ်သက်ရာ ကက်ဆက်ခွေတွေ ယူလာပြီး စန္ဒာဝင်းမှာ ဖွင့်ခိုင်းပြီး နားထောင်ရင်း အာလပသလာပ အတွက် အချိန်ကုန်နေကျပါပဲ။

အဲဒီနေ့မှာတော့ သူတို့ဝင်လာတဲ့အချိန်မှာ ကိုင်ဇာရဲ့ ချစ်တေးလှိုင်းကို ဖွင့်ထားတဲ့အတွက် အခွေဆုံးအောင် သူတို့ စောင့်နေကြတယ်။ အခွေက နောက်တစ်ကျော့ ပြန်ရစ်နေတာနဲ့ သူတို့လည်း စားပွဲထိုးကောင်လေးကိုခေါ်ပြီး စိုင်းထီးဆိုင်ခွေ ဖွင့်ခိုင်းလိုက်တယ်။ အဲအချိန်မှာပဲ အခြားဝိုင်းက အရက်မူးနေသူ တစ်ယောက်က - စိုင်းထီးဆိုင်က အလကားပါကွာ.. မဖွင့်နဲ့ - ဆိုပြီး ထပြောတာ ကြားလိုက်ရတယ်။ ကျောင်းသား ၃ ယောက်လည်း ပြသနာ ဖြစ်မှာစိုး၍ ဥပေက္ခာ ပြုပြီး သူတို့ ကက်ဆက်ခွေကိုသာ ဖွင့်ပေးဖို့ ဆိုင်ရှင်ကို ပြောလိုက်တယ်။ အရက်မူးနေသူက ဆိုင်ရှင်ကို ထပြောတဲ့ ကိုဝင်းမြင့် (၁) ကို ရုတ်တရက် ခွေးခြေငယ်နဲ့ ခေါင်းကို ထရိုက်လိုက်တယ်။ ကျောင်းသား ၃ ယောက်နဲ့ ရပ်ကွက်သားများ ရန်ပွဲဖြစ်သွားရတယ်။ ကျောင်းသားများ ကျောင်းဝင်းထဲ ပြန်ပြေးလာပြီး ကိုဝင်းမြင့် (၁) ခေါင်းက ဒဏ်ရာများတဲ့အတွက် ဆေးခန်းပို့ ကြတယ်။ အင်းစိန်ရဲစခန်းကို သွားပြီး အမှုဖွင့်တော့ ရဲတွေက လဘက်ရည်ဆိုင်မှာ စစ်ချက်ယူကာ ကိုဝင်းမြင့် (၁) ကို ရိုက်တဲ့သူကို ဖမ်းဆီးခဲ့တယ်။

၁၉၈၈ ခု မတ်လ (၁၃) ရက် တနင်္ဂနွေနေ့ မနက်မှာ ဖမ်းဆီခေါ်ဆောင်ခံခဲ့ရတဲ့သူဟာ ရပ်ကွက်ကောင်စီ ဥက္ကဋ္ဌရဲ့ သားဖြစ်နေတဲ့ အတွက် သက်ဆိုင်ရာက ပြန်လွှတ်ပေးခဲ့ပါတယ်။ ကျောင်းသားများ ကြားသိရတဲ့အခါမှာတော့ ဒေါသအမျက်ချောင်းချောင်းထွက်ပြီး ကျောင်းသား ၃၀ လောက် လူစုပြီး ရက်ကွက်ကောင်စီရုံးခန်းကို သွားအော်ခဲ့ပါတယ်။ ကောင်စီဥက္ကဋ္ဌက ကျောင်းသားများနဲ့ တွေ့ဆုံစကားပြောဖို့ ငြင်းပယ်ခဲ့တဲ့အတွက် ကျောင်းသားများက ရုံးခန်းထဲဝင်ပြီး စားပွဲကုလားထိုင်များကို ရိုက်ချိုးဖျက်ဆီးခဲ့ပါတယ်။ ကျောင်းသားများလည်း ကျောင်းဝင်းတွင်းကို ပြန်လာခဲ့ပါတယ်။ ကျောင်းသားများ ပြန်လာပြီးနောက် ကောင်စီရုံးနားက သမ၀ါယမဆိုင် မီးလောင်ခဲ့ပါတယ်။ ကြို့ကုန်းရပ်ကွက်က လူများက ကျောင်းသားတွေ မီးရှို့တယ်လို့ ထင်နေကြတယ်။ အဲဒီနောက် စနေနေ့က ရန်ဖြစ်ခဲ့တဲ့ ကျောင်းသား ၃ ယောက် နဲ့ အခြားကျောင်းသားအုပ်စုက လဘက်ရည်ဆိုင် အနီးလမ်းဆုံမှ နေပြီး ရပ်ကွက်တွင်းလူများနဲ့  ရန်ပွဲထပ်ဖြစ်ကာ ကိုဝင်းမြင့် (၂) ဓားနဲ့ထိုးခံလိုက်ရပါတယ်။ (ဒီ သမ၀ါယမဆိုင်ကို အာဏာပိုင်တွေက တမင်သက်သက် မီးရှို့ ဖန်တီးပြီး ရပ်ကွက်ကလူတွေနဲ့  ကျောင်းသားတွေကို ရန်တိုက်ပေးခဲ့တာပါ)။

ကျောင်းသားများလည်း ကျောင်းကို ပြန်ပြေးပြီး လူစုကြပြန်တယ်။ လူစုပြီး ကျောင်သား ၂၀၀ ခန့် အုပ်စုကြီးက လဘက်ရည်ဆိုင်ဘက် လမ်းဆုံဆီကို ချီတက်ကြတယ်။ ရုတ်တရက် မမျှော်လင့်တဲ့ မြင်ကွင်းတစ်ခုက ကျောင်းသားများကို စောင့်ကြို နေခဲ့ပါတယ်။ မီးသတ်ပိုက်တွေ အသင့်ပြင်ထားတဲ့ မီးသတ်ကားတွေက အသင့် စောင့်နေကြပါတယ်။ ကျောင်းသားတွေ အင်းစိန်လမ်းပေါ်အရောက်မှာ ရပ်ကွက်သားတွေကို ရပ်ကွက်လူကြီးတွေက ထိန်းနေသလို ဆရာ ဆရာမများနဲ့ အဆောင်မှုးတွေကလည်း ကျောင်းသားတွေ နောက်ကိုလိုက်လာပါတယ်။ အဲဒီ့အချိန်မှာပဲ မရမ်းကုန်း လမ်းဆုံဘက်မှ တက်လာသော ရဲချုပ်ကား၊ လုံထိန်းကားများ နဲ့ နိုင်းတူးနိုင်း ကားနက်ကြီးတစ်စီးတို့ ဟာ ကျောင်းသားများနဲ့ ရပ်ကွက်သားများအကြားကို ၀င်ရောက်နေရာယူလိုက်ပါတယ်။ ပညာရေး ဒု-၀န်ကြီး ဒေါက်တာမောင်ဒီ ကား နဲ့ တိုင်းရဲမှုး ဦးဖေကြည်ရဲ့ ရဲချုပ်ကားကတော့ ဘီပီအိုင်ဆေးဝါးစက်ရုံ လမ်းကြားထဲကို ဆက်ဝင်သွားပါတယ်။ ကားပေါ်က ၀တ်စုံပြည့် သံခမောက်၊ ဒိုင်းများ ၊ ဂန်းပိုက်များ၊ သေနတ်များ၊ တုတ်များနဲ့ လက်နက်အပြည့်စုံပါသော လုံထိန်းများက နေရာယူလိုက်ကြပြီး သေနတ်တွေ နဲ့ ကျောင်းသားတွေကို ချိန်ထားလိုက်ကြပါတယ်။

ကျောင်းသား နဲ့ ရပ်ကွက်သားကြားက ရန်ပွဲရဲ့ ဒေါသမီးပွားက ကျောင်းသားနဲ့ လုံထိန်းကြားက ပဋိပက္ခ အသွင်သို့ ပြောင်းလဲသွားခဲ့ပါတယ်။ ကျောင်းသားများရဲ့ ဒေါသတွေက သေနတ်နဲ့ ချိန်ထားတဲ့ လုံထိန်းတွေပေါ် ပုံသွားခဲ့တယ်။ ဆရာတွေက အနောက်ကနေ အော်ဟစ်သတိပေးနေတယ်။ ဆရာတွေရဲ့ အော်ဟစ် သတိပေးသံ မဆုံးခင်မှာပဲ သေနတ်တွေ မိုးပေါ်ထောင်ဖောက်လိုက်သံကို ဆက်တိုက်ကြားလိုက်ရတယ်။ မီးကျည်တွေလည်း မိုးပေါ်မှာ တဖောင်းဖောင်းနဲ့ ပစ်တင်လိုက်တယ်။ မျက်ရည်ယိုဗုံးတွေ ကျောင်းသားအုပ်ကြားထဲကို ပစ်သွင်းလိုက်တယ်။ ကျောင်းသားတွေရော ဆရာတွေပါ ကျောင်းဝင်းထဲ ၀င်ပြေးကြတယ်။ လုံထိန်းတွေက ကျောင်းဝင်းထဲ ပြေးဝင်သွားတဲ့ ကျောင်းသားတွေနောက်ကို လိုက်ပစ်ပါတော့တယ်။

ပစ်ကွင်းထဲကို ၀င်လာတဲ့ ကျောင်းသား ၃ ယောက် လဲကျသွားတယ် အကြီးကျယ် ဒဏ်ရာ ရသွားတယ်။ ကိုဖုန်းမော် (ဓာတုအင်ဂျင်နီယာ ကျောင်းသား) ၊ ကိုစိုးနိုင် (စက်မှုအင်ဂျင်နီယာ ကျောင်းသား၊ ပုသိမ်)၊ ကိုမြင့်ဦး (စက်မှုအင်ဂျင်နီယာ၊ ပြွန်တန်ဆာ) တို့ ဒဏ်ရာ အပြင်းအထန် ရလိုက်တယ်။ ကျည်သင့်ပြီး လဲကျသွားတဲ့ ကိုဖုန်းမော်ကို ဆရာဦးသိန်းထွန်းအောင်က ၀င်ဆွဲတယ်။ ကိုဖုန်းမော်မှာ ဆရာဦးသိန်းထွန်းအောင် လက်ထဲမှာပဲ သေဆုံးခဲ့ပါတယ်။

ဒဏ်ရာ အပြင်းအထန်ရထားတဲ့ ကိုစိုးနိုင် နဲ့ ကိုမြင့်ဦး တို့ ကို ဆွဲခေါ်လာခဲ့ပါတယ်။ ကျန်ဒဏ်ရာ ရတဲ့ ကျောင်းသားတွေကိုတော့ ၀င်ဆွဲနိုင်ဖို့ မတတ်နိုင်ကြတော့ပါ။ တရစပ် ပစ်ခတ်နေတဲ့ကြားထဲမှာ ကျောင်းသား ၂၀ ခန့် ဒဏ်ရာ ရခဲ့ပါတယ်။ ကျောင်းသားတွေလည်း ကျောင်းဆောင်တွေထဲကို ခြေကုန်သုတ် ပြေးဝင်ကြရပါတယ်။

အတန်ငယ်ကြာတော့ သေနတ်သံတွေ တိတ်ဆိတ်သွားခဲ့ပါတယ်။ ကျောင်းသားတွေလည်း အခြေအနေကို ကြည့်ပြီး ဆရာတွေ နဲ့ အတူ ကိုဖုန်းမော် ၊ ကိုစိုးနိုင်နဲ့ ကိုမြင့်ဦးတို့ကို ဆေးရုံပို့ ဖို့ စီစဉ်ကြပါတယ်။ ကျောင်းဝင်းတစ်ခုလုံးလည်း ငရဲပွက်တဲ့အလား ယမ်းငွေ့တွေ ဖုံးလွှမ်းခဲ့ရပါပြီ။

ကျောင်းသားများက ကျောင်းဆောင်တွင်းမှာ အရေးပေါ် တိုင်ပင်စည်းဝေးကြတယ်။ ပညာရေးဝန်ကြီးထံသို့ အချက် (၇) ချက် တောင်းဆိုရန် သဘောတူကြတယ်။ အဲဒီ တောင်းဆိုချက်တွေကတော့ .... ကျောင်းဝင်းတွင်း ကျောင်းသားများအား ပစ်ခတ်သတ်ဖြတ်မှု နှင့် ပတ်သက်ပြီး သတင်းများမှ အမှန်တိုင်း ထုတ်ပြန်ကြေညာပေးရန်၊ သေဆုံးသွားသော ကျောင်းသားများနှင့် ဒဏ်ရာရကျောင်သားများ၏ မိသားစုများအား ထိုက်တန်သော လျော်ကြေးပေးရန်၊ သေဆုံးသွားသော ကျောင်းသားများအား နိုင်ငံတော်ဈာပန အခမ်းအနားဖြင့် ထိုက်တန်စွာ ဂုဏ်ပြုသင်္ဂြိုလ်ပေးရန်၊ ပတ်ခတ်သတ်ဖြတ်ခဲ့သည့် တရားခံ အစစ်အမှန်များကို အပြစ်ဒဏ်ပေးရန်၊ ကျောင်းသားများ၏ အခွင့်အရေးကို တာဝန်ယူဆောင်ရွက်ပေးနိုင်သည့် တရားဝင် ကျောင်းသားအဖွဲ့အစည်းတစ်ခု ဖွဲ့စည်းခွင့်ပေးရန်၊ ကျောင်းများ မပိတ်ရန်၊ ကိုဖုန်းမော်၏ ဈာပနကို ကျောင်းသားများကိုယ်တိုင် ဦးဆောင်ကျင်းပခွင့်ပေးရန် စသည်ဖြင့် တောင်းဆိုကြခဲ့ပါတယ်။

ကျောင်သား ၁၃ ဦးက ကျစ်လျစ်သော အမာခံသွေးသောက်အဖွဲ့ ဖွဲ့စည်းလိုက်ပြီး အသက်သေခံ တိုက်ပွဲဝင်ရန် ဆုံးဖြတ်လိုက်ကြတယ်။ ပညာရေးဝန်ကြီးဌာန ဒု-၀န်ကြီး ဒေါက်တာမောင်ဒီလည်း ကျောင်းကို ညတွင်းချင်း ပေါက်ချလာပြီး ကျောင်းသားများရဲ့ တောင်းဆိုချက်တွေကို ပယ်ချလိုက်တယ်လို့ ကြေညာလိုက်တယ်။

စက်မှုတက္ကသိုလ် ကျောင်းဝင်းအတွင်းမှာတော့ ကျောင်းသားတွေ ပင်မ အဆောက်အဦးကြီးရှေ့မှာ ပြန်စုမိကြပြန်ပြီ။ ည ၁၂ နာရီ ထိုးတော့မယ်။ ရှေ့ဆက် ဘာလုပ်ကြမလဲ တိုင်ပင် ဆွေးနွေးကြပြန်တယ်။ နောက်ဆုံး ကိုဖုန်းမော် သွေးမြေကျခဲ့ရတဲ့နေရာမှာ တော်လှန်ရေး ကြယ်ပွင့်လေးလုပ်ဖို့ ဆုံးဖြတ်ကြတယ်။ မြို့ပြအင်ဂျင်နီယာက ကျောင်သားတွေ ဦးဆောင်ပြီး ကိုဖုန်းမော် ကျဆုံးခဲ့တဲ့ ပင်မ အဆောက်အဦး ရဲ့ သြဘာလမ်းထိပ်နေရာမှာ ကျောင်းတွင်း မြို့ပြအင်ဂျင်နီယာဌာနကရှိတဲ့ ဘိလပ်မြေ အုတ်ကျိုးလေးတွေ နဲ့ ကြယ်ပွင့်လေး စတင် တည်ဆောက်လိုက်တယ်။ တစ်ကျောင်းလုံးအနှံ့လိုက်ပြီး သေနတ် ကျည်ဆံခွံတွေ၊ မီးကျည်ခွံတွေ ၊ မျက်ရည်ယိုဗုံးခွံတွေ၊ ကျောင်းသားတွေရဲ့ မီးပေါက်ရာ အ၀တ်အစားတွေ၊ သွေးစွန်းနေတဲ့ အ၀တ်အစားတွေကို လိုက်ရှာ စုဆောင်းပြီး ကြယ်ပွင့်ထဲကို စုထည့်ကြတယ်။ နောက်တော့ ကျောင်းသားတွေက စွယ်တော်ရွက်တွေကို ဆေးလိပ်မီးနဲ့ တို့လို့ အပေါ်က ဖြန့်ကြဲပြီး ကြယ်ကို ပိတ်လိုက်ကြတယ်။

ကျောင်းမှာ ဖွေးဖွေးလှုပ်အောင် ပွင့်နေတဲ့ စွယ်တော်ပွင့်တွေနဲ့ ပန်းခွေတွေလုပ်ပြီး ကျောင်းသားတစ်ယောက်က လက်ဝဲစာလုံးနဲ့ ကိုဖုန်းမော် နာမည်ကို ရေးပြီး ပန်းခွေမှာ ကပ်လိုက်တယ်။ ကျောင်းသားတွေရဲ့ အံကြိတ် တောက်ခေါက်သံတွေ၊ ကျောင်းနံရံကို ခေါင်းနဲ့ ဆောင့်ပြီး အော်ဟစ် ငိုကြွေးသံကိုလည်း ကြားနေရတယ်။ ကျောင်းသားအချို့လည်း လမ်းမပေါ်မှာ ဒူးထောက်ချ ပန်းခွေတွေရှေ့မှာ ဦးစိုက်ပြီး ငိုကြွေးနေတာကိုလည်း တွေ့နေရတယ်။ မနက် ၅ နာရီ ၂၅ မိနစ်မှာ တိတ်ဆိတ်စွာ ကျောင်းကို တစ်ပတ်ပတ်ပြီး ကြယ်ပွင့်ရှေ့မှာ ပန်းခွေချ အလေးပြုခဲ့ကြတယ်။ မတရားပစ်ခတ် သတ်ဖြတ်မှုအတွက် အလျှော့ပေးလို့ မဖြစ်တော့ဟု ခံပြင်းပြီး ပြန်လည်တုန့်ပြန်ဖို့ ဆုံးဖြတ်လိုက်ကြတယ်။

ဒဏ်ရာ ပြင်းထန်စွာ ရထားတဲ့ ကိုစိုးနိုင် နဲ့ ကိုမြင့်ဦးကို ရန်ကုန်ဆေးရုံကြီးကို ပို့လိုက်ပါတယ်။ သူတို့ နှစ်ယောက်ကို သီးသန့် လူနာခန်းမှာ ထားပါတယ်။ အခန်းဝမှာ ရဲတွေ စောင့်နေပါတယ်။ ကိုစိုးနိုင် တို့ကို ဒဏ်ရာတွေ ပြင်းထန်စွာရထားတဲ့ကြားက ကုတင်တိုင်တွေမှာ ခြေတွေလက်တွေကို သံကြိုးတွေနဲ့ ချည်ထားပါတယ်။ ကိုစိုးနိုင်မှာ အသဲထဲသို့ ကျည်ဆံဝင်သွားပြီး ကိုမြင့်ဦးကတော့ ၀မ်းဗိုက်နဲ့ ဆီးအိမ်မှာ သေနတ်ဒဏ်ရာ ရခဲ့ပါတယ်။ အရေးပေါ်ခွဲစိတ်ကုသရန် ဆရာဝန်များ တင်ပြတာကို သက်ဆိုင်ရာအာဏာပိုင်များက တားမြစ်ခဲ့တယ်လို့ ကြားသိရပါတယ်။ ကျည်သင့် ဒဏ်ရာရထားသော အခြား ကျောင်းသား ၆ ယောက်ကိုလည်း လက်ထိပ်ခတ်ပြီး လှိုင်ရဲစခန်းကို ခေါ်သွားတယ်။ ၄ ယောက်က သတိလစ်နေတယ်လို့ သိရတယ်။

၁၉၈၈ ခုနှစ် မတ်လ (၁၄) ရက်နေ့ တနင်္လာနေ့ မှာ ကျောင်းပြန်ဖွင့်တော့ ကျောင်းသားတွေ စာသင်ခန်းကို ပြန်သွားကြပါတယ်။ အားလုံးကတော့ လေးလံသော ခြေလှမ်း ညှိုးနွမ်းသော စိတ်နှလုံးတွေ နဲ့ မတ်လ ရဲ့ နွေအပူ ရော ရင်ထဲကအပူမီး ပါရောပေါင်းပြီး တိတ်ဆိတ်စွာ စာသင်ခန်းဆီကို ရွေ့လျားကြပါတယ်။ အားလုံးရဲ့ စိတ်အစဉ်က နေ့လည် မြန်မာ့အသံမှ သတင်းကြေငြာချက်ဆီ အာရုံတွေလွှင့်ထားကြတယ်။

နေ့လည် (၁) နာရီမှာ သတင်းကြေငြာတော့ စက်မှုတက္ကသိုလ်ကျောင်းသားများနဲ့ အနောက်ကြို့ကုန်း ရပ်ကွက်သားများ ခိုက်ရန် ဖြစ်ပွားမှုကြောင့် ကျောင်းသား မောင်ဖုန်းမော် သေဆုံးပြီး၊ မောင်စိုးနိုင်မှာ ရန်ကုန်ဆေးရုံကြီးတွင် အတွင်းလူနာ အဖြစ် ကုသထားရကြောင်း သတင်းကို မလှိမ့်တစ်ပတ် လုပ်ပြီး ကြေငြာလာတယ်။ ပညာရေးဝန်ကြီး ဦကျော်ငြိမ်း နေရာမှာ ဒေါက်တာကျော်စိန် ကို ပြောင်းလဲ ခန့်ထားလိုက်ကြောင်း ကြေညာတယ်။

ကျောင်းသားများရဲ့ ဒေါသတွေ ပေါက်ကွဲကုန်ပြီ။ တောင်းဆိုချက် (၇) ရပ်နဲ့ ကိုဖုန်းမော် ကျဆုံးခဲ့ရသော ဖြစ်ရပ်မှန်ကို ကြေညာချက် ၂ စောင် ထုတ်ပြီး စာရိုက်ထုတ်ဝေကြတယ်။ အစည်းဝေးတွေ စတင်ကျင်းပကြတယ်။ အခြားသော တက္ကသိုလ်တွေကို သွားပြီး စာရွက်စာတမ်းတွေ ဝေငှကြတယ်။ ဖြစ်ရပ်မှန်တွေကို လိုက်လံဟောပြောကြတယ်။

ရန်ကုန်စက်မှုတက္ကသိုလ်ဝင်း အတွင်းမှာလည်း ကျောင်းသားတွေက တောင်းဆိုချက် (၇)ချက် နဲ့ အတူ ကိုဖုန်းမော် ကျဆုံးရခြင်းမှာ မ.ဆ.လ အစိုးရ၏ လုံထိန်းများ ပစ်ခတ်သတ်ဖြတ်မှုကြောင့် ဖြစ်ကြောင်းကို ပါမောက္ခချုပ် ဦးခင်အောင်ကြည်အား အတည်ပြု လက်မှတ်ရေးထိုးခိုင်းခဲ့ပြီး ပညာရေးဝန်ကြီး ထံသို့ တင်ပြတောင်းဆိုခိုင်းခဲ့တယ်။ မော်ကွန်းထိန်း ဦးဘိုအေးက တာဝန်ယူ လက်မှတ်ရေးထိုးပေးခဲ့တယ်။ ပညာရေးဝန်ကြီး ဒေါက်တာကျော်စိန်က (၁၄) ရက်မှ တာဝန်များကို စတင်ထမ်းဆောင်တာဖြစ်တဲ့အတွက် သူနဲ့ မသက်ဆိုင်ကြောင်း၊ အထက်ကို တင်ပြပေးမည် ဖြစ်ကြောင်း အကြောင်းပြန်ခဲ့တယ်။

ထို့နောက် ကျောင်းသားများက မော်ကွန်းထိန်း ဦးဘိုအေး အား ထပ်မံ လက်မှတ်ရေးထိုးစေပြီး တတိယမြောက် ကြေညာချက် ဖြစ်သော ရန်ကုန်စက်မှု တက္ကသိုလ်ဝင်း အတွင်း ကျောင်းသားများ သွေးမြေကျခဲ့ရသော ဖြစ်ရပ်မှန်မှာ လုံထိန်းများ၏ သေနတ်ဖြင့် ပတ်ခတ်မှု နှင့် မျက်ရည်ယိုဗုံး များကြောင့် ဖြစ်ကြောင်း ပါမောက္ခချုပ်၊ ပါမောက္ခများ၊ ဌာနမှုးများ၊ ဆရာ ဆရာမများနှင့် ကျောင်းသား ကျောင်းသူများ ကိုယ်စား ၀န်ခံ အတည်ပြုကြောင်း ကြေညာစာတမ်းကို ထုတ်ဝေခဲ့တယ်။ အခြားသော ကောလိပ်များ နှင့် တက္ကသိုလ်များကိုလည်း လိုက်လံ ဖြန့်ဝေခဲ့တယ်။

ကျောင်းသားများအားလုံး ည (၈) သတင်းကို စိတ်ဝင်တစား စောင့်မျှော်နေကြတယ်။ အစိုးရက သတင်းထုတ်ပြန်ချက်ကို ည (၈) နာရီ သတင်းမှာ ကြေညာလိုက်တာကတော့ .. စက်မှုတက္ကသိုလ်ကျောင်းသားများ နဲ့ ကြို့ကုန်းသားများ ရန်ဖြစ်ကြရာမှာ ကျောင်းသားမောင်ဖုန်းမော်မှာ ဓားထိုးခံရပြီး သေဆုံးခဲ့ပါတယ်လို့ ပစ်ခတ်သတ်ဖြတ်မှု ကို မတောင်းပန် မကြေညာတဲ့ အပြင် ပြောင်ပြောင်တင်းတင်း ဗြောင်လိမ်လိုက်တယ်။ ကျောင်းသားများ အားလုံး ဒေါသထွက် ပေါက်ကွဲပြီး အဆောင်ပြူတင်းပေါက်တွေကို ရိုက်ချိုးကြတယ်။ အဆောင်မှာ လူစုကြတယ်။ အစည်းအဝေးတွေ ကျင်းပြကြတယ်။ လုံထိန်းများကလည်း ညဘက်မှာ ကျောင်းကို သေနတ်တွေနဲ့ ချိန်ထားခဲ့တယ်။

၁၉၈၈ ခုနှစ် မတ်လ (၁၅) ရက် မနက်မှာ ၉ နာရီ လောက်တည်းက ရန်ကုန်စက်မှုတက္ကသိုလ်ကို လုံထိန်းတွေ၊ ရဲတွေ ၊ သံချပ်ကာ ကားတွေက ၀ိုင်းထားလိုက်ပါတယ်။ သမိုင်းဝင်းတွင်းမှ ကျောင်းသားများကလည်း လိုက်လံလူစုပြီး အာအိုင်တီ ဆီကို ချီတက်လာကြပါတယ်။ သမိုင်းလမ်းဆုံ အရောက်မှာ ရဲများ လုံထိန်းများက သံဆူးကြိုးများ နဲ့ ကာပြီး လမ်းပိတ်ထားတာကို တွေ့ရတယ်။ ခဏ ကြာတာ့ လမ်းဖွင့်ပေးပြီး ကျောင်းသားတွေကို သွားစေတယ်။ ကျောင်းသားတွေ သွားပြီးတာနဲ့ သံဆူးကြိုးတွေ ပြန်ပိတ်ပြီး လုံထိန်းတွေက နောက်က လိုက်လာပါတယ်။

သံဆူးကြိုးတွေ ကို တစ်ဆင့်ခြင်း ကာရံရင်း လမ်းပိတ်ရင်း၊ ကျောင်းသားများကလည်း မကြောက်မရွံ့ မတုန်လှုပ် ဆက်လက်ချီတက်ရင်း အာအိုင်တီ ကျောင်းဝင်းရှေ့ ကိုရောက်လာခဲ့တယ်။ ကျောင်းဝင်းရှေ့မှာလည်း လုံထိန်းတွေ ရဲတွေ က အပြည့် နေရာယူထားတယ်။ ချီတက်လာတဲ့ ကျောင်းသားတွေ ပိတ်မိနေပြီ။ ကျောင်းဝင်းထဲလည်း ၀င်လို့ မရ ၊ နောက်လည်း ပြန်ဆုတ်လို့ မရအောင် ညှပ်ပူးညှပ်ပိတ် ပိတ်မိထားပြီ၊။ ကျောင်းသားများ လမ်းမှာ ထိုင်ချသူထိုင် ရပ်သူရပ်နဲ့ ပေကပ်ပြီး နေကြတယ်။

ခဏကြာတော့ အဓိကရုဏ်းနှိမ်နှင်းရေး ခေါင်းဆောင်ဆိုသူက လာရောက် အမိန့်ပေးတယ်။ ကျောင်းသားတွေကို ကျောင်းဆောင်တွေကို ပြန်ခိုင်းတယ်။ မပြန်ရင် ပစ်မိန့်ပေးထားတယ်လို့လည်း ခြိမ်းခြောက်ပြောဆိုတယ်။ ရပ်ကွက်တွင်းက လူတွေကိုလည်း ကျောင်းသားများက ရန်ပွဲအတွက် ကျောင်းသားတစ်ယောက် သေရတာကို မကျေနပ်လို့ ရက်ကွက်ကို ဖျက်ဆီးမီရှို့ဖို့ လာတယ်လို့ မဟုတ်မမှန် လီဆယ် သတင်းလွှင့်ထားတဲ့အတွက် ရပ်ကွက်သားများကလည်း တုတ် ဓားတွေ နဲ့ ကျောင်းသားတွေဆီကို ထွက်လာကြတယ်။ ကျောင်းသားများလည်း တိုင်ပင်ဆွေးနွေးကြပြီး လှိုင် ကောလိပ် နဲ့ ရန်ကုန်တက္ကသိုလ် (ပင်မ) ဆီကို အင်အားစုရန် သွားဖို့ ဆုံးဖြတ်လိုက်ကြပြီး နေ့လည် (၂) နာရီ ကျော်လောက်မှာ ကျောင်းရှေ့က ပြန်လှည့်ခဲ့ကြတယ်။

နေ့လည် (၃) နာရီ (၁၅) မိနစ်တွင် လုံထိန်း များ၊ စစ်ကား များနှင့် အတူ စစ်သားများက ကျောင်းဝင်းတွင်းကို ညာသံပေး ၀င်လာကြတယ်။ စစ်သား များက ကားပေါ်က ခုန်ဆင်းလာပြီး နံပါတ်တုတ်များ ၀င့်ရင်း ကျောင်းသားတွေ ဆီကို ပြေးဝင်လာကြတယ်။ ကျောင်းသားများ ထိတ်လန့် တကြားနဲ့ ထွက်ပြေးကြတာကို လိုက်ရိုက်ရင်း ဖမ်းမိသူများ ဒဏ်ရာရသူများကို စစ်ကားပေါ် ဆွဲတင်ကြတယ်။ ကန်တင်း စားသောက်ဆိုင်တွင် ထိုင်နေသော ကျောင်းသားများကိုပါ ၀င်ဆွဲကြတယ်။ ဆရာများအဆောင်နှင့် ကျောင်းသားဆောင်တွေကိုပါ ပိတ်လိုက်ကြပြီး ကျောင်းဝင်း တစ်ခုလုံးကို ၀င်စီးလိုက်ကြတယ်။

ပြန်လည်း ခုခံဖို့ ကြိုးစားတဲ့ ကျောင်းသားတွေကို အကြမ်းပတမ်း ရိုက်နှက်ဖမ်းဆီးကြတယ်။ ကျောင်းသားတွေကိုလည်း ကျောင်းရှေ့  မြက်ခင်းပြင်မှာ စုပြီး ထိုင်ခိုင်းစေတယ်။ သြဘာလမ်းထိပ်က သွေးမြေကျ အထိမ်းအမှတ် ကြယ်ကိုလည်း ဖျက်ဆီးလိုက်ကြတယ်။ ကျောင်းသား (၆၀၀) ကျော်ကို ဖမ်းဆီးခေါ်ဆောင် သွားခဲ့တယ်။

ည (၈) နာရီ သတင်းမှာတော့ အရေးအခင်း ဖြစ်ပွားမှု အကြောင်းကို သတင်းထုတ်ပြန် ကြေငြာခဲ့သည်မှာ “ကျောင်းသားများ ဆူပူမှုကြောင့် တပ်မတော်သားများနှင့် ပြည်သူ့ရဲများက ကျောင်းဝင်းအတွင်းသို့ ၀င်ရောက်ကာ ကျောင်းသားများကို ဆွေးနွေး၍ အခြေအနေကို ထိန်းသိမ်းလိုက်ရကြောင်း၊ ရပ်ရွာအေးချမ်းသာရေးနှင့် တရားဥပဒေစိုးမိုးရေးကို နှောက်ယှက်ဆူပူ ကြသူများအား ထိရောက်စွာ အရေးယူမည် ဖြစ်ကြောင်း” မဟုတ်မမှန် ပြောဆိုခဲ့ကြပါတော့သည်။

ဤသို့ ဖြစ်ပွားခဲ့သော အာဏာရှင်လူသတ်သမားတို့ ၏ သွေးဆာသော လက်နက်ဖြင့် ရိုင်းစိုင်းစွာ ပစ်ခတ်မှုကြောင့် ၁၉၈၈ ခုနှစ်၊ မတ်လတွင် စက်မှုတက္ကသိုလ်ကျောင်းသား ကိုဖုန်းမော်၊ ကိုစိုးနိုင်တို့  အသက်ဆုံးရှုံးခဲ့ကြရပြီး ကျောင်းသားထု၏ သွေး မြေကျခဲ့ရသည့် မတ်လသမိုင်းအား မည်သို့ မျှပင် မေ့ပျောက်နိုင်တော့မည် မဟုတ်ပေ။

(မပျိုပျိုမေ၏ ဖေါ်ပြချက်များကို အခြေခံ၍ ပြန်လည်ရေးသားဖေါ်ပြအပ်ပါသည်)။

နစ်နေမန်း။