အောင်ဆန်းကလေးဘ၀ (ဒုတိယပိုင်း)။ (ဗိုလ်ချူပ်အောင်ဆန်း မွေးနေ့ အမှတ်တရ - ဖေဖေါ်ဝါရီ ၁၃ ရက်)။

အလိုလိုက်ခံရသော်လည်း အောင်ဆန်းမှာ မတရားလုပ်ချင်သည့်စိတ်၊ မတရားအခွင့်အရေး လိုချင်သည့်စိတ်ဓာတ်မျိုး မရှိပါ။ မိမိကိုယ်ကိုမိမိ ယုံကြည်သူဖြစ်သည့်အတိုင်း သူများအား မနာလိုသည့်စိတ် မရှိပါ။ မိမိထက် ကြောသွားမည်ကို စိုးသည့်အတွက် သူများအား ခြေထိုးလိုသည့် စိတ်မျိုးလည်း အလျဉ်းမရှိပါ။ အောင်ဆန်းနှင့် အချို့နိုင်ငံရေးခေါင်းဆောင်များ ကွာခြားခြင်း သည် ထိုစိတ်ဓာတ် အခြေခံကြောင့်ပင် ဖြစ်သည်ဟု ကျွန်တော် ထင်ပါသည်။

အောင်ဆန်းသည် အလွန်ရိုးသား၍ စားချင်လျှင် စားချင်သည်၊ လိုချင်လျှင် လိုချင်သည်၊ ကြောက်လျှင် ကြောက်သည် စသည်ဖြင့် ဖွင့်ဟ၀န်ခံ တတ်ပါသည်။ မည်သည့်အခါမှ လိမ်မပြောတတ်ပါ။

ကျွန်တော်တို့ငယ်စဉ်က နတ်မောက်ဆွမ်းကြီးလောင်းအသင်းက ကြီးမှူး ၍ ၀ါတွင်း၌ အပတ်စဉ် အိုးစည်ဗုံမောင်းဖြင့် အလှူခံထွက်ပါသည်။ လူတယောက်က ဖိုးသူတော်အရုပ်ကြီးထဲ ၀င်ပြီး ကပါသည်။ ထိုအရုပ်ကြီးကို အောင်ဆန်း အလွန်ကြောက်ပါသည်။ အရုပ်ကို ကြောက်ရကောင်းလားဟု ဖခင်က ဆူပူပြစ်တင်သောအခါ “ဖင်ခေါင်းထဲသွင်းထား ဘယ့်နဲ့လုပ်မလဲဗျာ့” ဟု ပြန်ဖြေပါသည်။

ခေါင်းတုန်တုန် လည်တုန်တုန် ဖြစ်နေသော မယ်ရွှေမယ်ဆိုသည့် အမယ်ကြီးကိုလည်း သူကြောက်၍ ကြောက်ကြောင်းကိုလည်း သူဝန်ခံပါသည်။ ညအိပ်လျှင် မိခင်ကို ဖက်အိပ်လေ့ရှိ၍ မိခင်ကို သူ့ဘက်သို့ အမြဲလှည့်အိပ် စေချင်သည်။

အိမ်နားရှိ ကာကာဆိုင်သို့လည်း သူမသွားရဲပါ။ တနေ့သ၌ ကာကာ ဆိုင်သို့သွား၍ ဘီ-ဒီ ဆေးလိပ်များဝယ်ပြီးလျှင် ချိုးကြည့်ပါသည်။ မိခင်သိသော အခါ ကလေးအား ဆေးလိပ်ရောင်းလိုက်သော ကုလားထံသွား၍ ဆူပူ ပြစ်တင်ပါသည်။ ဆိုင်ရှင် ကာကာက မိခင်ကိုတောင်းပန်၍ အောင်ဆန်း ဘက်လှည့်ကာ “နောက်တခါလာရင် ဘန်ဘူးပေးမယ်” ဟု ပြောလိုက်ရာ အောင်ဆန်းက “ဘန်ဘူးဆိုတာဘာလဲ” ဟု မိခင်ကို မေးပါသည်။ မိခင်က “ဘန်ဘူးပေးမယ်ဆိုတာ ရိုက်မယ်လို့ ပြောတာ” ဟု ပြောလိုက်ရာ၊ အောင်ဆန်း သည် ထိုနေမှစ၍ ကာကာဆိုင်သို့ မသွားတော့ပေ။

နေမကောင်းလျှင် ပိုက်ဆံပေးမှ ဆေးသောက်မည်ဟု အကြပ်ကိုင်တတ် သဖြင့် အောင်ဆန်းသည် နေမကောင်းတိုင်း မိခင်ထံမှ ငွေဒင်္ဂါး လေး-ငါးဆယ် ရပါသည်။ (ထိုခေတ်က ငွေစက္ကူ ပေါ်သေးဟန် မတူပါ။)

နတ်မောက်၌ တဆိုင်တည်းသာရှိသော ကာကာဆိုင်သို့ မသွားရဲသဖြင့် သူလိုချင်သည့် ပစ္စည်းများကို ကျွန်တော်က ၀ယ်ပေးရပါသည်။ ကျွန်တော် လိုချင်သည်တို့ကိုလည်း သူ့ ငွေဖြင့်ပင် ၀ယ်ခွင့်ပေးပါသည်။ ညီအစ်ကို ရန်ဖြစ် သောအခါ သူ့ ငွေ ပြန်ပေးရန် တောင်းတတ်ပါသည်။ မိခင်က “နင် အစက ဘာလို့ ပေးသလဲ” ဟု မေးသောအခါ “အို သူက ညီအကိုချင်းဘဲကွာ ဘာ ညာနဲ့ ပြောတာကိုးဗျာ့” ဟု ပြန်ဖြေသဖြင့် ကျွန်တော်တို့ ရယ်ကြရပါသည်။ အောင်ဆန်း သည် မည်သည့်အခါမှ လုပ်ကြံ၍ လည်ဆည်၍ မပြောတတ်ပါ။ ပေးခဲ့လျှင် ပေးခဲ့သည်၊ လုပ်ခဲ့လျှင် လုပ်ခဲ့သည်ဟု ပွင့်ပွင့်လင်းလင်း ဖွင့်ဟ ၀န်ခံ တတ်ပါသည်။

ကျွန်တော်တို့မိခင်သည် အလွန် ပညာလိုလားရကား ကျွန်တော်တို့ ငါးနှစ်ခြောက်နှစ်အရွယ် ရောက်လျှင် ကျောင်းထားပါသည်။ အောင်ဆန်းသည် ကျောင်းနေရမှာ ကြောက်သဖြင့် 'အမနေမှ နေမယ်" ဟု မိခင်ကို ပြောပါသည်။ “ကျွန်တော်တို့မိခင်ကို ကျွန်တော်တို့က “အမ” ဟု ခေါ်ကြပါသည်။” အထွေးဆုံး သားကလေးကို အလွန်ချစ်ခင်သော မိခင်ကလည်း အောင်ဆန်းကို ကျောင်းမပို့ ရက်ဘဲ ခွင့်လွှတ်ထားရပါသည်။

ကျွန်တော် ၁၁ နှစ်သားအရွယ် ရောက်သောအခါ ရှင်ပြု၍ ကိုရင် ၀တ်ပါသည်။ ခုနှစ်နှစ်ကျော် ရှစ်နှစ်သားရှိနေပြီဖြစ်သော အောင်ဆန်းသည် ကျောင်းမနေသေးသော်လည်း ကျွန်တော့်ထံ နေ့စဉ်လာပါသည်။ ထိုသို့လာရင်း ကိုရင် ၀တ်ချင်စိတ် ပေါက်လာသဖြင့် ကိုရင်ဝတ်ပေးရန် မိခင်ကို ပူဆာပါသည်။ ချက်ကောင်းကိုယူတတ်သော မိခင်က “ကိုရင်ဝတ်တယ်ဆိုတာ လွယ်တာ မဟုတ်ဖူးကွ၊ စာတတ်မှ ၀တ်လို့ရတာ၊ မင်းလို စာမတတ်တဲ့လူက ကိုရင်ဝတ်လို့ ဘယ်ဖြစ်မလဲ” ဟု ဆွပေးလိုက်ပါသည်။ “ဒီလိုလား၊ ဒီလိုဆို ကျောင်းနေမယ်” ဟု ပြောပြီး အောင်ဆန်းသည် ထိုအချိန်မှစ၍ ကျောင်းနေပါတော့သည်။

« မှတ်ချက်။ ။၁၉၃၂-၃၃ ခု ကောလိပ်ကျောင်းရောက်စ ပထမနှစ် ၌လည်း အောင်ဆန်းသည် သင်္ကန်းဝတ်၍ အီတာလီယံ ဘုန်းတော်ကြီး ဦးလောကနထနှင့်အတူလိုက်ကာ သာသနာပြုလိုစိတ် ဖြစ်ပေါ်လာသဖြင့် မိခင်ထံ ခွင့်တောင်းဘူးပါသည်။ မိခင်က ခွင့်မပြုသဖြင့် မလိုက်ဖြစ်ခဲ့ပေ။»

ဤသို့ဖြင့် အောင်ဆန်းသည် နတ်မောက်ရှိ ဒီပင်္ကရာကျောင်းခေါ် ဦးသောဘိတကျောင်းသား ဖြစ်လာပါသည်။

(ဗိုလ်ချူပ်အောင်ဆန်း၏ အကိုဖြစ်သူ ဦးအောင်သန်း ရေးသားသော “အောင်သန်း၏ အောင်ဆန်း” စာအုပ်မှ ပြန်လည်ဖေါ်ပြအပ်ပါသည်)။