.JPG)
သတင်းစာဆရာကြီး ဦးဝင်းတင်ရဲ့ “၇၉ နှစ်မြောက်” မွေးနေ့ ရက်မြတ်မင်္ဂလာ။
(ဘဘ ဦးဝင်းတင်၏ ပုံတူပန်းချီကား ရေးဆွဲသူ မူလပိုင်ရှင်အမည် SUUCHITTHU ပါ ပန်းချီအား ထပ်မံဖေါ်ပြအပ်ပါသည်။ နစ်နေမန်း ပထမရရှိသော ပုံတွင် မူလပိုင်ရှင်အမည် မပါရှိခဲ့သောကြောင့် ရရှိခဲ့သောပုံပါအတိုင်း ဖေါ်ပြခဲ့ခြင်း ဖြစ်ပါသည်)။
ယနေ့  မတ်လ (၁၂) ရက်နေ့ ဟာ သတင်းစာဆရာကြီး ဘဘ ဦးဝင်းတင်ရဲ့ “၇၉ နှစ်မြောက်” မွေးနေ့ ရက်မြတ်မင်္ဂလာလည်း ဖြစ်ပါတယ်။ ဘဘ ဦးဝင်းတင်ကို ၁၉၈၉ ခုနှစ်မှ ၂၀၀၈ ခုနှစ်ထိ အနှစ် (၂၀) နီးပါး အာဏာရှင်တွေက မတရားဖမ်းဆီး ထောင်ချခဲ့ကြပါတယ်။ သတင်းစာဆရာကြီး ဘဘ ဦးဝင်းတင်ဟာ အာဏာရှင်တို့ ထံ လုံးဝအရှုံးမပေးဘဲ အကျဉ်းထောင်အတွင်းမှာ အမှန်တရားအတွက် ရဲရင့် စွာနဲ့  နေထိုင်ပြောဆိုခဲ့သူ ဖြစ်ပါတယ်။
သတ္တိရှိ၍ တည်ကြည်ဖြောင့်မတ်သူ ဟု လူထုခေါင်းဆောင် ဒေါ်အောင်ဆန်းစုကြည် ကိုယ်တိုင်က ညွှန်းဆိုခဲ့တဲ့ ဘဘဦးဝင်းတင်ရဲ့  မွေးနေ့မှာ ဘဘ ဦးဝင်းတင် အသက်ရှည်ရာ အနာမဲ့ကြောင်း မွေးနေ့  ဆုတောင်းမေတ္တာ ပို့သအပ်ပါတယ်။
နအဖအကျဉ်းထောင်အတွင်းမှာ အကျဉ်းကျနေစဉ် ရေးသားသီကုံးခဲ့တဲ့ သတင်းစာဆရာကြီး ဘဘ ဦးဝင်းတင်ရဲ့  ကဗျာလေးတစ်ပုဒ်ကို ဖေါ်ပြရင်း လေးစားစွာ ဂုဏ်ပြုအပ်ပါတယ်။
ကျားရဲ။
နေပြင်းလျှင် နှင်းမှုန်လျှင်
ဆွေ့ဆွေ့ခုန် အိုက်လိုအိုက်
ခိုက်ခိုက်တုန် ချမ်းလိုချမ်း။
အခန်းကျဉ်းကျဉ်း
အလင်းမ၀င် လေမ၀င်
နေမမြင် လမမြင်
လူမမြင် သူမမြင်မှာ
ထိုင်လျှင်ထိုင် မထိုင်လျှင်ငေး။
အိပ်လျှင်အိပ် မအိပ်လျှင်တွေး။
သတင်းမေးဖို့ ဝေးရော
သီချင်းကလေးမှ မဆိုရ။
စာဖတ်ဖို့ ဝေးရော
ကဗျာလေးမှ မစပ်ရ။
တရားဟောဖို့ ဝေးရော
စကားလေးမှ မပြောရ။
အဟောသိကံ သံသရာ
ငါ့ကမ္ဘာ့ ပိစိကွေး
အခန်းကျဉ်းကလေး ပတ်လျှောက်လိုက်
သံတံခါးဝရပ်လိုက်
တမတ်တပ်တပ် တနေကုန်။
မနေ့ကလည်း တနေကုန်
ဒီနေ့လည်း တနေကုန်ပြန်
နက်ဖြန်လည်း ကုန်အုန်းမယ်။
ကုန် ကုန် ကုန်
ကုန်ချင်သလောက် ကုန်စမ်း။
တရက် ကုန်မလား၊ တသက် ကုန်မလား။
တလ ကုန်မလား၊ တဘ၀ကုန်မလား။
တနှစ် ကုန်မလား၊
တခေတ် ကုန်မလား။
အားမလျှော့ဘူး၊ မပျော့ဘူး။
ပေဖြစ်တော့ခံမယ်၊ တူဖြစ်တော့ နှံမယ်။
အမှန်တရား တို့ဘက်မှာရှိတယ်။
ပြည်သူအများ တို့ဘက်မှာရှိတယ်။
ကာလယန္တရား တို့ဘက်မှာရှိတယ်။
ရှင်တော်ဘုရား တို့ဘက်မှာရှိတယ်။
သိကြရဲ့လား... ဟား ဟား ဟား ဟား။
တိရိစ္ဆာန်ရုံက ကျားလို
လှောင်အိမ်ထဲမှာ တလွန့်လွန့်နဲ့
ကျားညွန့်တုံးတွေ ထင်နေသလား။
မှားလိုက်တဲ့အမြင်
ဟားတိုက်လို့ ရယ်ချင်စရာ။
မှတ်ထားဟေ့။
အ၀ါပေါ်မှာ အနက်စင်း
မပျက်မယွင်း ကွက်ကွက်ကွင်း။
အရှင်းသား မလွဲသရွေ့
အထင်းသား စွဲသရွေ့
ကျားရဲဟာ ကျားရဲ။
ငါလဲ အဲဒီလိုပဲကွ ဟေ့။ ။
(သတင်းစာဆရာကြီး ဦးဝင်းတင်)။
No comments:
Post a Comment