.JPG)
နိုင်ငံရေးအကျဉ်းကျခံရသူများအတွက် အသက်မွေးဝမ်းကြောင်းလိုင်စင်နှင့် ကျောင်းပြန်တက်ရခွင့်ရရှိရေးသတင်းစာရှင်းလင်းပွဲပြုလုပ်။
နိုင်ငံရေးကြောင့် အကျဉ်းကျပြီးနောက် အသက်မွေးဝမ်းကျောင်းလိုင်စင်နှင့် ကျောင်းပြန်တက်ခွင့် ပိတ်ပင်ထားမှုများ ပြန်ရရှိရေးနှင့် ပတ်သက်သည့် သတင်းစာရှင်းလင်းပွဲကို ယနေ့နံနက်ပိုင်းက ရန်ကုန်မြို့ အိုလံပစ်တာဝါတွင် ပြုလုပ်ခဲ့သည်။
ယနေ့ ရှင်းလင်းပွဲကို လိုင်စင်ပိတ်သိမ်းခံထားရသော ရှေ့နေဥိးအောင်သိန်းနှင့် အခြားသော နိုင်ငံရေး အကျဉ်းသားဟောင်း ရှေ့နေ၊ ဆရာဝန်များ ပါဝင်ကာ ရှင်းပြခဲ့သည်။
နိုင်ငံရေးမှုကြောင့် အကျဉ်းထောင်အသီးသီးတွင် အကျဉ်းကျခံခဲ့ရသူများအနက် ပြန်လည် လွတ်မြောက် လာသော ရှေ့နေများ ကျောင်းသားများနှင့် ဆရာဝန်များအတွက် အသက်မွေး ၀မ်းကျောင်းလိုင်စင်နှင့် ကျောင်းပြန်တက်ခွင့်တို့မှာ လက်ရှိ အခြေခံ ဥပဒေအရ ရရှိသင့်သည့် အခွင့်အရေးများ ဖြစ်သဖြင့် လူအခွင့်အရေးကော်မရှင်က ဖြေရှင်းပေးသည့်သည်ဟု ရှေ့နေဦးသိန်းသန်းဦးက ပြောသည်။
“ကျွန်တော်တို့ Rights ကို ဒီနေ့ပယ်ပယ်နယ်နယ် သိမ်းခံထားရတဲ့ ကိစ္စတွေဟာ ကျွန်တော်တို့ တံခါးကို ကျွန်တော်တို့ လက်နဲ့ ခေါက်ဖွင့်ပြီး တောင်းမယ်” ဟု ၎င်းကို လိုင်စင်မဲ့ ရှေ့နေဟု ရည်ညွှန်းခေါ်ဆိုသူ ဦးအောင်သိန်းက ပြောပြသည်။
၎င်းကပင် သက်မွေးဝမ်းကျောင်း လိုင်စင်မှာ မိမိတို့၏ အခွင့်အရေးဖြစ်၍ အမျိုးသား လူ့အခွင့်အရေးကော်မရှင်က ဖြေရှင်းပေးခြင်း မပြုနိုင်ပါက သမ္မတ ဦးသိန်းစိန်ထိ တင်ပြသွားမည်ဟု ပြောသည်။
ဆမ (ဆေးကုခွင့်လိုင်စင်) ပိတ်သိမ်းခံထားရသူ ဆရာဝန် ဦးဇော်မြင့်မောင် ကလည်း “ ကျွန်တော်တို့ နိုင်ငံရေးဘ၀က ရှိပြီးပြီ သပ်သပ်စီဆက်သွားမယ်။ ဒါပေမဲ့ ကျွန်တော်တို့ရဲ့ ပရော်ဖက်ရှင်နယ် လူမှုဘ၀ကို ပြန်လိုချင်တယ်” ဟု ရှင်းပြသည်။
မြန်မာနိုင်ငံဆရာဝန်များအသင်းနှင့် ဆေးကောင်စီက အဝေးရောက်နေသည့် ဆရာဝန်များကို ပြန်လာပြီး နိုင်ငံပြန်လည် တည်ဆောက်ရေး လုပ်ငန်းများ လုပ်ရန်ခေါ်သကဲ့သို့ နိုင်ငံရေးကြောင့် ထောင်ချခံရကာ ဆမ အသိမ်းခံထားရသည့် ဆရာဝန်များအတွက်လည်း စဉ်းစားသင့်သည် ဟု ၎င်းက ပြောခဲ့သည်။
သတင်းစာရှင်းလင်းပွဲသို့ နိုင်ငံရေးမှုဖြင့် ထောင်ဒဏ်ကျရောက်ခဲ့သော ကျောင်းသားကျောင်းသူများ ဖြစ်သော ကိုအာကာဘို ကိုရဲမင်းဦး မဖြိုးဖြိုးအောင် မနွဲ့နှင်းရည် (ခေါ်) နိုးနိုးနှင့် ဆရာဝန်း(၂)ဦး၊ကျောင်းသား/သူ (၅) ဦး၊ ရှေ့နေ့ (၁၈) ဦးတက်ရောက်ခဲ့ပြီး ၊ သတင်းဌာနာမှ သတင်းစာဆရာ (၂၅) ဦးတို့ တက်ရောက်ခဲ့ပါသည်။
၎င်းတို့အထဲမှ မနိုးနိုးက “နိုးနိုး အကိုက ကျောင်းသွားအပ်တာ လူကိုယ်တိုင်လာဖို့ ကျောင်းက ပြောလွှတ်တယ်။ ဟိုတလောက ရပ်ကွက်ရုံးကတော့ ကျောင်းဆက်တက်ဖို့ အစီစဉ်ရှိရင် သူတို့ ကူညီပါ့မယ်လို့ ပြောတယ်။ လုပ်တော့ မကြည့်ရသေးဘူး” ဟု ပြောသည်။
(ပေးပို့ လာသော ကိုဗိုက်ပူအား ကျေးဇူးတင်ရှိပါသည်)။
No comments:
Post a Comment